和繁華的台北比起來，嘉義這个樸實的所在，無啥物車嘛無啥物人，較早嘛無啥物藝術活動。毋過，有一陣人對10外冬前，用in的熱情，佇這片土地，開始搬戲予鄉親看。彼陣，in猶閣是十七八歲的少年家，有一个夢，in想欲佇in的故鄉，組一个劇團，予較濟人會使透過藝術有無仝款的感受。in開始佇嘉義18个鄉鎮，搬戲予囡仔看；in嘛做誠濟台語戲，改編西方經典，閣有台灣文學，連結台灣發生的代誌，講予觀眾聽；in逐冬舉辦藝術節，共藝術變做是一件平凡的體驗；in佇嘉義市開一个「新嘉義座」，教課、辦活動，傳播藝文的種子、推捒台語文。in聊聊仔行，一步一跤印。偏鄉演出，陪囡仔眠夢；社團教學，予青少年有夢；做台語戲，行向家己的理想和向望。這馬in閣行向別个縣市，別个國家，共台灣味的戲，搬予全世界的人看。嘛希望有一工，全世界的人，會專工來嘉義，看in的戲。藝術，會影響一陣人，一陣人做伙，會當影響一个所在，予台灣這片土地愈來予好。
